Американската амбасада во Скопје попладнево излезе со соопштение откако во Собранието пратениците на владејачката коалиција гласаа против барањата на СЈО за измена на законите за заштита на сведоци и продолжување на рокот на постоење на тоа обвинителство.
„Ги охрабруваме сите партии да се придржуваат кон обврските преземени со договорите од Пржино и од 20 јули за да осигураат веродостојни избори и непречена работа на Специјалното обвинителство и на независните набљудувачи на медиумите“, се вели во соопштението на Американската амбасада во Скопје.
Оттаму додаваат дека веруваат дека целта на СЈО е независна истрага во докажување на правдата.
„Воспоставувањето отчетност за неавторизираните прислушувања и сомнежите за владина злоупотреба се суштествени за да може Македонија да излезе од продолжената криза. Веруваме дека се разумни барањата на СЈО за поддршка на темелна, независна истрага на фактите“, се вели во соопштението на амбасадата на САД во Скопје.