Израелците вечерва триумфираа на „Филип Втори“ со 2:1, Јаховиќ промаши пенал за реми во судиското продолжение на средбата
https://www.youtube.com/watch?v=sWdcPBhFUYQ
Македонија го забележа вториот пораз во квалификациите за Светското првенство во Русија во 2018 година. По поразот од Албанија во Скадар со 2:1, со ист резултат загуби и вечерва на „Филип Втори“ од Израел. Хемед и Бен Хајм ги постигнааа головите за гостинската селекција во 25 минута, односно, 43-та, Несторовски во 63-та го ублажи поразот.
„Црвено-жолтите“ добија пенал во судиското продолжение по стартот врз напаѓачот на Палермо што не успеа во погодок да го претвори Јаховиќ. Гореш ја прочита неговата намера и ги обезбеди трите бода за Израелците.
„Ниту се бројат шанси, ниту се памети игра. Во фудбалот се паметат резултати. Фудбалерите максимално се бореа да избегнат пораз вечерва, но фалеше подобра реализација. Во финишот не реализиравме и пенал. Не можам да замерам ништо на играчите. Она во што се надевам е дека ќе заиграме подобро и ќе почнеме да освојуваме бодови“, рече македонскиот селектор Ангеловски по средбата.
Македонија играше и создаваше шанси, Израелците даваа голови и се радуваа на крајот. Нивни херој беше 36 годишниот голман Давид Гореш кој го одбрани ударот од белата точка на Јаховиќ и ги сочува оние 1:2 на семафорот до крај.
„Македонија создаде многу шанси, а ние имавме среќа и одличен голман вечерва. Негово искуство за справување со притисок беше од големо значење за нас иако има 36 години. Имаше периоди во натпреварот во кои бевме добри и периоди во паѓавме. Чесно е да се признае дека домашната репрезентацја не притисна во второто полувреме. Постигна гол, имаше шанси за втор, имаше и пенал меѓутоа среќни и задоволни се враќаме дома“, истакна Елиша Леви, кормилар на Израел.
Италија и Шпанија во дербито во групата Г одиграа 1:1, Албанија со 2:0 славеше на гостувањето во Лихтенштајн. Македонија – Израел 1:2 (0:2) Арена „Филип Втори“ во Скопје.
Гледачи – 5.000. Главен судија – Андре Маринер (Англија). Асистенти – Џејк Колин и Гери Бесвик – Англија. Жолти картони: Гореш, Битон, Коен, Тиби (Израел). Црвен картон: Тиби (Израел). Стрелци – Несторовски 63’ (Македонија); Хемед 25’, Бен Хајм 43’ (Израел). Македонија: Богатинов, Жута, Ристевски, Мојсов, Шиков, Алиоски, Несторовски, Пандев, Хасани, Ристовски, Петровиќ. Селектор – Игор Ангеловски Израел: Гореш, Даса, Давидзада, Битон, Захави, Коен, Хемед, Бен Хајм, Голаса, Цедек, Тиби. Селектор – Елиша Леви
Квалификации за СП 2018 Група Г
Резултати, 2. коло: Македонија – Израел 1:2, Италија – Шпанија 1:1, Лихтенштајн – Албанија 0:2
Табела
1. Албанија 2 2 0 0 4:1 6
2. Шпанија 2 1 1 0 9:1 4
3. Италија 2 1 1 0 4:2 4
4. Израел 2 1 0 1 3:4 3
5. Македонија 2 0 0 2 2:4 0
6. Лихтенштан 2 0 0 2 0:10 0
Идно коло (9 октомври): Македонија – Италија, Албанија – Шпанија, Израел – Лихтенштајн