Европскиот клупски фудбал е пред реформи што се неизбежнни. Богатите се подготвуваат за Суперлига, заложбите на „малите“ се регионални лиги како Северна, Источна и, секако, екс Ју лига, проект што добива ветар во грб во УЕФА по изборот на Слловенецот Чеферин за нејзин нов претседател
Ново фудбалско обединување на регионот одамна не е само идеја туку многу повеќе од тоа. Проектот, се чини, добива силен ветар во грб по изборот на Словенецот Александар Чеферин за нов претседател на УЕФА и со него би биле опфатени клубовите од некогашната голема југословенска четворка (Партизан, Црвена звезда, Динамо Загреб и Хајдук) меѓутоа и клубови како Вардар, Олимпија, Сараево, Железничар. Од седиштето на УЕФА во Нион „протече“ информација според која најголемите, најбогатите клубови во Европа се подготвуваат за револуционерен чекор да направат сопствена Суперлига.
Мотивите, пред се, се финансиски и замислена е да биде пандан на моментната Лига на шампиони. Разликата би била во намерата во неа како гости да заиграат и некои екипи од Азија и Севера и Јужна Америка. Тоа би било еден вид на елитно ниво. Наредното под него би значело дисперзија на лиги по региони како оваа на клубови од поранешната СФРЈ за што сите регионални медииуми пишуваат. Потоа Северна лига во која би учествувале екипи од Белгија, Холандија, Данска (иницијатива на Копенхаген), Шведска, Финска, но и претставници од Шкотска, Лига на Источна Европа, средно-европска лига, итн.
Ова би значело дека Вардар ќе добие сигурна покана за настап во неа што беше дел и во минатото. Колку поскора реализација, толку подобро за општото добро на фудбалот на овие простори. Тоа би било мамка за враќање на публиката на стадионите, зголемен интерес, гостувања на Партизан, Црвена звезда, Хајдук и Динамо Загреб, меѓу другите, на „Филип Втори“, и навраќање на старите дерби натпревари. Во националните првенства, како што пишува белгградски „Блиц“ би играле клубови што не би биле во ранг на Суперлига или регионалните лиги.
Но, спортскиот мотив би останал со можноста за напредување во регионалните лиги или губење на статусот во нив и испаѓање во националните шамионати. Хрватскиот портал „Индекс“ нагласува дека реформите во европскиот клупски фудбал ќе дојдат многу скоро и неизбежни се. Затоа и „малите“ клубови се принудени да бараат решенија. Едно од нив е фудбалската лига на клубови од поранешна Југославија што, секако, би почнала со забрана за гостувања на навивачи од безбедносни причини.