Никола Груевски се обидува да штелува бројки по нарачани анкети од партиските испостави, во зависност од интензитетот на неговиот страв од одговорност, но од вистината бегање нема, реагираат од СДСМ.
„Ништо не може да му помогне на обвинетиот Никола Груевски кој на 11 декември ќе ја добие вистинската анкета од граѓаните пред кои ќе мора да одговара. Обвинетиот Никола Груевски се соочи со фактот дека мора да оди на избори на 11 декември и оттаму потекнува новата хаотична анкета на партискиот институт Димитрија Чуповски, на којшто му излета мнозинското разочарување на граѓаните во економијата, се вели во соопштението од СДСМ.
Реакцијата на СДСМ доаѓа по објавување на телефонската анкета на институтот „Димитрија Чуповски” која била спроведена на 1.237 испитаници од 7 до 10 октомври , каде се покажало дека 27,6 отсто од испитаниците на наредните предвремени парламентарни избори ќе гласаат за ВМРО-ДПМНЕ, 16, 1 одсто, за СДСМ, за ДУИ 6,3одсто, за ДПА 2,9 одсто, за ГРОМ 1,4 одсто. За ниту една партија нема да гласат 22,8 отсто од испитаниците, а за кого ќе гласаат сѐуште не знаат 17,4 отсто од анкетираните граѓани.