Граѓаните заслужуваат подобар живот и ние имаме план да создадеме услови за тоа, изјави денеска лидерот на СДСМ, Зоран Заев на средбата со заменик-претседателката на групата на Прогресивната алијанса на социјалисти и демократи, Тања Фајон.
– Тоа ќе го обезбедиме на фер и регуларни, демократски избори заедно со граѓаните на Македонија, кои мора да се случат и ќе се случат. Македонија плаче за промени, вели Заев, кој на средбите со Фајон и европскиот пратеник Кнут Флекештајн разговарале токму за ова.
Лидерот на СДСМ го посочи иселувањето на младите од земјава како еден од клучните проблеми кои, како што вели тој, како совесни граѓани, мора да се промени.
– Ова е моментот заедно да создадеме сегашност и иднина за нашите деца и за државата. Во овој многу важен историски процес кога се бориме да ги обновиме демократските институции, да поставиме здрави темели во разрушените економија, здравство, правда, од врвно значење е Македонија да добие демократски и легитимно избрана влада, потенцираше Заев.
Во својата изјава пред медиумите, Фајон потенцираше дека на Македонија и се потребни промени, и вели на државата и е потребно тоа.
– Ние поддржуваме во Македонија да има подобар живот. Навистина се потребни промени бидејќи работите не се одвиваат како што треба. Младите ја напуштаат земјата. Насекаде од разговорите што ги имав со граѓаните, може да се види дека ситуацијата не е нормална, дека има лоша економска ситуација, проблеми во здравството и има навистина потреба од промени, изјави Фајон, дополнувајќи дека за таа цел, потребни се фер и демократски избори.
Фајон нагласи дека демократите од Европа ќе ги следат изборите во Република Македонија, бидејќи истите се од големо значење, за да бидат уредно и фер признаени.
Таа остварила средба и со Специјалното јавно обвинителство на кого му порачала дека ја ужива поддршката во работата, а рече и дека недозволиво е граѓаните да бидат уценувани во предизборието и токму од тие причини, неопходни се изборите.