Активисти кои со години се борат за човековите права, правата на хомосексуалците, правото на абортус, ги критикуваат лошите одлуки на власта се најдоа на истите пратенички листи со Ферид Мухиќ, кој е децидно против абортусот и Лилјана Поповска од ДОМ (партијата на зелените), жената која додека беше во коалиција со власта се исекоа најголем број на дрвја во Скопје. Мухиќ беше контроверзен и по тоа дека за протестите од кои произлегоа граѓанските пленуми во Босна и Херцеговина говореше дека се планирани, оркестрирани и со детално разработени цели, што отвори дилеми околу дали и како одредени кандидати на оваа листа „шарените“ ќе се согласуваат со него.
Мухиќ и Поповска се двајцата кандидати за пратеници на листите на опозициската СДСМ и здружената опозиција за кои се крена најмногу врева. Претседателката на градската организација на СДСМ, Софија Куновска вчера си даде оставка токму поради оваа причина. Безброј реакции имаше и на социјалните мрежи со кои се бараше Мухиќ и Поповска да се отстранат од листите.
Поповска попушти под големиот притисок на јавноста и денеска најави дека од четвртото добитно место, таа ќе се премести на некое од недобитните места.
„ Многу пати досега сум се откажала од функции и не сакам да предизвикувам раздор и тоа ќе го сторам и овој пат. ДОМ има одличен кадар и тој што ќе влезе во Собранието, со моја помош ќе ја продолжиме битката за демократизација на општеството. Во политиката е важен личниот пример. Никогаш не сум жалела за моите потези и сега нема да зажалам. Човек треба да ги следи своите принципи и да мисли пред сè за општото добро“, рече Поповска.
Павле Богоевски, активист од „Шарената револуција“ кој е дел од листите на СДСМ, вели дека точно е тоа дека со некои од кандидатите имаат различни ставови, но тоа не е проблем затоа што тие ставови ќе ги дискутираат во Собранието.
„Едвај чекам тие ставови да ги соочиме во Собранието. Точно е дека Лиле Поповска во изминатиот период се приклучи на борбата против режимот. Јас можам да кажам дека останувам на моите ставови и во Собранието ќе ги застапувам до крај. Инаку морам да кажам дека е за поздравување одлуката на Поповска да се повлече од своето пратеничко место во име на единството.
Мухиќ вели дека добил и позитивни и негативни реакции.
„Морам да кажам повеќе добив многу позитивни реакции и сум многу задоволен поради тоа. Добив и негативни реакции, но нив не ги ни погледнав. Задоволен сум што многу луѓе ми дадоа поддршка. Останувам на моите ставови и сум цврсто убеден дека нема никакво оправдување во тоа да се убие дете, свое или туѓо“, ни изјави Мухиќ.
Листите на кандидатите се уште не се затворени и можат да претрпат промени. Краен рок до кој партиите можат да ги достават листите е петок на полноќ.