Три месеци од поплавите кои го зафатија Скопско, граѓанскиот активист Павле Богоевски, реагира за непреземената одговорност како и исплатата на трошоците.
– Зошто власта бараше ново задолжување од 36 милиони евра? За да исплати оштети кои не ги покриваат ниту најосновните трошоци на санирање на штетите? За да ја намали штетата врз својот рејтинг пред изборите? Или за да им додели уште една финансиска стимулација на своите фирми, склучувајќи договори во четири очи за санација на инфраструктурата, без распишување на тендер?, прашува Богоевски.
Тој смета дека градоначалникот на град Скопје, Коце Трајановски треба да одговори колку пари од средствата за „обесштетување на граѓаните“ се издвоени за фирмите блиски до партијата во договори во четири очи.
– Никој се’ уште нема преземно одговорност. Ниту за неодговорното работење кое резултираше со изгубени животи и огромни штети, ниту за патетичната некоординираност во периодот кој следеше по полавите. Овие луѓе мора да одговараат за својата неодговорност. Ниту едно оправдување за „виша сила“ или „водена бомба“ не може да ги избрише солзите на граѓаните, ниту да направи да заборавиме во чија надлежност беа нашите животи, беше нашата безбедност и нашата заштита и спасување, реагира тој.
Покрај Богоевски и граѓанските активисти Демијан Хаџи-Ангелковски и Александар Младеновски зборуваа на оваа тема во Стајковци.
– Санирана е само многу мал процент од штетата, а дополнително, не се отстранети ниту причинителите за катастрофалната поплава што го зафати овој регион. Асфалтирањето е изведено неквалитетно, а исто така е сомнителен начинот, односно приоритетот кој се дава за тоа како се асфалтираат и санираат улиците. Дополнително, минимална е поправката на обиколницата, а каналската мрежа ниту е исчистена, ниту се изградени нови канали за спречување на поплаван како таа која се случи во август, вели Хаџи-Ангелковски.
Младеновски вели иако бараните 36 милиони евра се веќе обезбедени преку нова еврообврзница, а не преку пренамена на средстства од некој од останите, непродуктивни проекти, Владата не обезбеди обесштетување на граѓаните.
– Во овие три месеци, исплатени се помалку од една четвртина од поплавените семејства. Сумите кои се исплаќаат се далеку под висината на реалните штети. Од терен има информации дека оштетите се делат по партиска линија, со цел ДПМНЕ да го зацврсти своето гласачко јадро во погодените подрачја. Се уште има семејства кои не биле посетени од Комисијата за процена на штети, реагира тој.
Во поплавите во Скопскиот регион загинаа 23 лица, а институциите се уште немаат излезено со официјална информација по истрагите за загинатите.