Јоханес Хан, комесарот за проширување, во среда на пладне ќе го објави новиот извештај на Европската комисија (ЕК) за Македонија, нашите соседи од Балканот и Турција.
Како што пишуваше НОВА на 29 септември годинава, се очекува дека во среда, како и лани, Комисија да ја повтори условената препорака, условена со целосна примена на договорот од Пржино, фер и демократски избори и примена на Итните реформски приоритети т.е. извештајот на групата експерти предводена од Рајнхард Прибе. Извештај кој нарекуваме “Прибе извештај” и кој ЕК го нарача откако изби скандалот на прислушуваните разговори во 2015 година.
Повторно условена препорака. Услов – добри избори, примена на Пржино и на Прибе извештајот.
Минатата година Комисијата вети дека ќе се наврати на препораката по изборите, па се очекува дека на почетокот на 2017 година ќе има нов извештај за Македонија.
Во овогодишниот извештај повторно ќе му се даде поддршка на Специјалното јавно обвинителство (СЈО). Може да се очекува дека Брисел ќе им даде поддршка на барањата на СЈО за продолжување на мандатот за поднесување на обвиненија и за законот за заштита на сведоци.
Подготовката за изборите беше коректна и се очекува дека и изборите на 11 декември ќе бидат доволно кредибилни за да и овозможат на меѓународната заедница да даде позитивна оценка за изборите. Тоа би му овозможило на Брисел да направи нов извештај и да условената препорака да ја врати во чиста препорака како што тоа беше случај во текот на шест години.
Минатата година Комисијата вака ја формулираше својата условеност во препораката:
“Во светло на напредокот направен досега во примената на политичкиот договор од јуни и јули (2015 година), ЕК е подготвена да ја продолжи својата препорака за отворање преговори за членство со поранешната југословенска Репулика Македонија. Тоа, сепак, е условено со континуирана примена на политичкиот договор од јуни и јули и занаен напредок во примената на итните реформски приоритет. Ова прашање ќе биде отворено повторно по изборите”, напиша ЕК на 10 ноември 2015 година.
Комесарот Јоханес Хан вети дека прашањето ќе се отвори наново по изборите. Но бидејќи избори немаше, прашањето остана затворено.
Како и минатата година така и оваа, судството нема да добие многу пофални зборови а политичкото мешање во работата на судството не може да не биде забележано од страна во Комисијата.
Лани Комисијата напиша дека “ситуацијата назадува од 2014 година бидејќи успесите на реформскиот процес од минатата деценија се сериозно поткопани од актуелното и потенцијално политичко мешање во работата на судството. Индициите за злоупотреби кои произлегуваат од пресретнати комуникации треба да бидат целосно истражени. Властите сега треба да покажат вистинска политичка волја за да се обезбеди целосна независност на судскиот систем, што подразбира и непречена работа за новоименуваниот специјален обвинител во истрагата за прислушуваните разговори и нивната содржина”.
Според случувањата во земјата во текот на годината што изминува не е тешко да се претпостави дека и во овој извештај ќе се најде речиси истата критика.
Следните извештаи на Комисијата ќе бидат објавени на пролет 2018 година. Во меѓувреме е можен посебен извештај за Македонија доколку изборите бидат фер.
Извештајот на ЕК заклучува дека примената на Итните реформски приоритети не дала резултати. Нема сомнение дека и извештајот за 2016 година Комисијата може од збор да збор да го повтори овој заклучок.
Како што НОВА пишуваше на 29 септември годинава, по објавувањето на овој извештај ќе следи пауза од година и половина. Според новиот план на политиката на проширувањето, извештаите за Балканот и за Турција од есен се селат на пролет па извештајот кој ќе ја покрива 2017 година ќе биде објавен во март 2018 година.