Државната изборна комисија на денешната седница едногласно ги отфрли кандидатските листи на Социјалдемократската партија на Македонија (СДПМ) за предвремените избори на 11 декември.
Сите 9 членови на ДИК гласаа против изборните листи на СДПМ, на кои носители беа лица со слични имиња и презимиња со кандидати од опозицијата.
Субхи Јакупи рече дека недостасуваат основните документи во поднесените листи на СДПМ, за што, според него вина има и правната служба на ДИК.
Атанас Урумов, образложи дека ДИК открила несовпаѓање на потписите на одредени кандидати во изјавите што треба да ги потпишат, некои изјави биле со датум 11 мај 2016, а имало неправилности и во изјавите за неосудуваност, кандидат предложен за една изборна единица во изјавата стои во друга изборна единица и друго.
И Силвана Бонева предложи листите да бидат отфрлени, а Игор Милев потенцира дека некој со умисла и свесно сакал да ја стави во заблуда ДИК.
Претседателот на СДПМ Бранко Јаневски има право во рок од 24 часа да се жали до Управен суд на оваа одлука на ДИК.
Државната изборна комисија на денешната седница треба да го разгледа и усвои Конечниот извештај за пријавите на граѓаните чиишто записи во избирачкиот список по спроведените административни и теренски проверки се спорни.