Второстепената комисија за инспекциски надзор донесе одлука со која се поништуваат решенијата на општина Центар за рушење на доградбата на објектот во сопственост на претседателот на Основниот суд Скопје 1, Владимир Панчевски и неговото семејство.
Според решенијата на општина Центар се работело за дивоградби, а семејството Панчевски уште пред да ја добие денешната одлука, самоиницијативно го сруши спорниот дел.
По денешната одлука, адвокатите на Панчевски најавија тужба против Центар и рекоа дека ќе бараат обесштетување.
– Државната комисија за одлучување од втор степен од областа на инспекцискиот надзор и прекршочната постапка донесе две одлуки со кои решенијата на општина Центар за рушење на наводната дивоградба на улица „Никола Вапцаров“ бр. 6 се поништуваат како незаконски, истакна адвокатот на инвеститорите Благоја Пеповски.
Иако додека ја рушеа доградбата во почетокот на ноември, адвокатот потенцираше дека тие самоиницијативно го прават тоа, денес вели, Панчевски и семејството биле принудени да постапуваат по незаконското решение на Центар и ќе бараат надомест на штета.
– Со оглед на тоа што инвеститорите беа принудени да постапуваат по вака незаконито решение, односно жалбата не го одлагаше извршувањето на истите, како и притисокот кој беше наметнат од овластените лица при општина Центар изразен преку јавни повици на фирми за рушење на наводната дивоградба, односно јавни повици за асистенција на МВР за постапување за сите тие решенија, инвеститорите претрпеа штета која е утврдена со градежно техничко вештачење, рече Пеповски.
Од Општина Центар, пак, велат дека ќе постапат според решението на Второстепената комисија, но дека повторното отворање на постапката ќе значи потврдување на решението за уривање.
„Второстепената комисија не навлегувајќи во суштината на проблемот, не навлегувајќи и не одлучиувајќи дали тоа е дивоградба или не е, правно формално наоѓа забелешки на донесеното решение. Како пример би ги издвоил дека се наведени само имотни листови, а дека не е наведена катастарската парцела, не е установена сосптвеноста која што општината ја има утврдено кога го издала решението за одобрение за реконструкција“, изјави Кочо Стојчевски од општина Центар.