„Ревизорскиот извештај на министерството за образование е во редовна постапка“, рече денеска републичкиот јавен обвинител Марко Зврлевски, одговарајќи на новинарско прашање по дебатата со студентите на Правниот факултет Јустинијан Први.
„Наодите од ревизорскиот извештај за министерството за образование е во редовна постапка и се постапува по нив“, кусо одговори Зврлевски.
Инаку претходно од обвинителството рекоа дека извештајот е распределен кај јавен обвинител и сега е предмет на разгледување и детална анализа. Доколку се утврдат елементи на сторено кривично дело ОЈО ќе започне постапка согласно законските надлежности. Зависно од видот на кривичното дело ќе се постапуваа соодветно според Законот за кривична постапка.
НОВА минатиот месец објави дека поранешниот министер за образование Абдилаќим Адеми и Спиро Ристовски живееле на висока нога на државна сметка.
Јаделе во најубавите ресторани, квалитетно се хранеле, а спиеле во хотели од минимум 4,5 ѕвезди. Поголем дел од податоците се за Адеми. Aко се соберат сите сметки од неговата службена картица од први јануари 2015 заклучно со 31 мај оваа година, Адеми од државното ќесе се честел со 20.000 евра.
Сите овие пари се потрошени во елитни ресторани како „Воденица“, „Балканика“, „Ла тераца“, ресторан „Момир“ во Охрид, ресторанот на „Микеи“ во Камник. Сумите се различни, почнувајќи од некоја скромна сметка од 1.000 денари, па се до 40 000 денари. За ручеци и вечери пари не се жалеле. За јунешки бифтек Адеми плати 5.200 денари, но и тоа било малку па се нарачало и телешко печење од 1.820 денари. А, во Момир во Охрид цехот излегол 19.310 денари. Одредени сметки, како онаа на Ристовски во скопскиот „Скара бар“ стасале дури и до 39 илјади за една вечера платена со буџетската картичка.