Холандија ќе земе еден дел од белгиската територија. По тој повод, белгискиот крал Филип отпатува во Холандија. Но не да се побуни или да се кара туку како гостин на свеченоста на овој чин на промена на границата помеѓу Белгија и Холандија.
И за нас на Балканот најчудното е тоа што белгиските и холандските медиуми воопшто не се возбудија поради размената на територија. Напротив, подвлекоа дека овој чин се одвива во “перфектна хармонија” помеѓу двете земји.
Според белгискиот министер за надворешни работи Дидие Рејндерс ова сведочи за “одличните холандско-белгиски односи” и “доказ дека границите можат да се менуваат на мирен начин”.
Веста се разбира беше објавена но не стаса на првите страни ниту пак предизвика коментари.
Министерот Рејндерс и неговиот холандски колега Берт Кундерс потпишаа пред два дена Договор за менување на границата. Модификацијата се случува во близината на градот Мастрихт во Холандија и белгискиот град Визе.
За што станува збор?
Актуелната белго-холандска граница беше фиксирана во 1843 година долж реката Мез. Во 1961 година беше одлучено да се поткрене коритото на реката за да се олесни пловидбата. Така дел од белгиското земјиште се најде од холандската страна на реката. И обратно.
Карта на менувањето на белго-холандската граница
Првиот обид за корекција на границата се случи во 1980 година но остана неуспешен. Во тоа време градоначалникот од белгиската страна и се спротивстави на оваа операција.
Потоа во 2012 година темата дојде повторно на маса на иницијатива на Холандија. Преговорите, кои се водеа околу заштитата на природата, менаџирањето на водите и уредување на територијата, доведоа до потпишување на протокол минатото лето.
Така во понеделникот во Хаг дојде до потпишување на договорот за промена на границите кој ќе стапи на сила на 1 јануари 2018 година поради тоа што парламентите на двете земји треба да го ратификуваат договореното.
Белгија ќе добие три хектари холандска територија но ќе остапи четиринаесет хектари кои се наоѓаат во заштитена природна зона.
Марсел Невен, градоначалникот на Визе, со насмевка изјави дека веста е убава затоа што “ќе земеме три хектари земја која има разновидна вегетација со 200 различни видови”.