Од почетокот на годината има 37 нови заболени од ХИВ, од кои двајца починале од СИДА кога им била откриена болеста. Ова е втор најголем пик од појавата на првиот случај во Македонија во 1987 година. Првиот пик е во 2014 та година со 45 случаи на ХИВ/СИДА. Овие податоци кои не беа достапни за јавноста до сега, ги обелодени Звонко Миленковиќ, директор на Инфективната клиника и Национален координатор за ХИВ.
„Од заболените 34 се машки, а три се од женски пол. Една третина од нив се млади до 30 години. Повеќето с е хетересексуалци “, рече Миленковиќ, на прес конференција пред новинарите.
Миленковиќ не знае дали финансиските средства од намалениот буџет од 27 милиони денари ќе бидат доволни за превенција и лекување за идната година.
„Дали овие средства ќе бидат доволни не знам, тоа зависи со каква епидемија ќе се сретнеме . Но, мислам дека ќе одговориме на предизвиците’, изјави Миленковиќ.
Буџетот за превенција за ХИВ за идната година е намален за 60 проценти, а граѓанските организации предупредуваат дека уште во првите шест месеци, до една година во Македонија може да избие епидемија и да се зголеми бројот на смртни случаи. Досега во државата се регистрирани 312 случаи и од кои повеќе од 80 починале. Македонија спаѓа во земјите со ниска стапка на заболени, токму заради донаторските средства кои беа вложувани од Глобалниот фонд кој од јануари повеќе нема да финансира во земјава.