Листата на фудбалери што се обвинети за затајување на данок од ден во ден расте. На неа се најдоа и тројцата поранешни членови на Реал Мадрид, Шпанецот Чаби Алонсо, Португалецот Рикардо Карвалјо и Аргентинецот Анхел ди Марија.
Тие се најдоа на тапет кај шпанските власти за даночно затајување во периодот од 2009 година до 2011 година. Случајот, нагласуваат надлежните, нема врска со аферата „Фудбал Ликс“. Под лупа се уште двајца играчи чиј идентитет не е објавен. Шпанските медиуми, сепак, пишуваат дека станува збор за Колумбиецот Радамел Фалкао и за Португалецот Фабио Коентрао.
Алонсо настапуваше во дресот на „кралскиот“ клуб од 2009 година до 2014 година кога се пресели во Баерн Минхен. Ди Марија играше за клубот од „Сантијаго Бернабеу“ од 2010 година до 2014 година по што кариерата ја продолжи во ПСЖ. Заедно со него во Мадрид пристигна и Карвало кој се задржа една година помалку и во 2013 година реши да ја прифати понудата на Монако. Стоперот моментно е без ангажман. Како позајмен играч во тимот од кнежевството моментно е Коентрао чиј клупски колега е Фалкао кој од 2011 година до 2013 беќе член на Атлетико Мадрид.