Индиската Комисија за хартии од вредност (СЕБИ) започна да ги враќа парите до индивидуалните инвеститори, кои од нив ги има земено групацијата „Сахара Груп“ во сопственост на тамошниот бизнисмен Субрата Рој, известија индиските медиуми. Како што е познато, Рој е заинтересиран да гради туристички комплекс на Охридското езеро, а овој скандал се појави токму по објавувањето на намерата за инвестиција во земјава.
Парите им се враќаат само на оние инвеститори чиј идентитет е точно утврден, што во Индија не е лесно, зашто има случаи каде што еден инвеститор е именуван на повеќе места во документите, има и случаи на повеќе адреси за еден инвеститор или, пак, случаи кога стотици инвеститори делат една адреса.
Според СЕБИ, „Сахара Груп“ должи 4,38 милијарди долари, а овие пари што сега им се враќаат на инвеститорите се од уплата извршена од страна на групацијата во износ од 934 милиони долари. „Сахара“ тврди дека износ од 3,65 милијарди долари има вратено на две компании што купиле нејзини обврзници директно, но ова треба допрва да се утврди од независни извори.
Најголем проблем со враќањето на парите ќе бидат оние инвеститори чии адреси и други детали не можат да се утврдат . Иако парите сега се враќаат на инвеститорите чиј идентитет е утврден, нивниот број е многу мал, споредено со барањата на околу 3 милиони инвеститори вкупно од кои компанијата има подигнато 4,38 милијарди долари.
За начинот на враќање на парите и на другите инвеститори и утврдувањето на нивниот идентитет се очекува насоки да даде Врховниот суд на Индија во јули. СЕБИ, инаку, се сомнева дека со парите има и други манипулации и побара од индиските државни агенции да проверат дали имало прекршувања на законите од страна на „Сахара“ во овој случај, вклучувајќи и перење пари преку фиктивни компании.
СЕБИ, исто така, поднесе и барање за казнување на „Сахара“, обвинувајќи ја групацијата дека не ги следи одлуките на судот, а побара и да се издаде наредба за апсење на нејзиниот шеф Субрата Рој, како и да се донесе одлука да му се забрани излез од земјата. И за овие барања ќе расправа Врховниот суд во јули.