Со состав што претставува спој на искуство и младост и засилен стручен штаб, машката ракометна репрезентација на Македонија денеска ги почнува подготовките за настап на Светското првенство во Франција. По претпладневниот собир во Скопје, националниот тим веднаш замина во Маврово каде ќе тренира до 30 декември.
За претстојната кампања Лино Червар, покрај Илија Темелковски, доби и двајца нови соработници. Во целокупната работа ќе асистираат Пепи Манасков и Александар Јовиќ, голманите ќе бидат во фокусот на Петар Мисовски и Ице Соколевски, за физичката подготовка ќе бидат задолжени Кристијан Кајчевски и Иван Теосављевиќ.
Репрезентативен повик добија 24 ракометари. Червар и соработниците во наредниот период ќе работат со Благојче Трајковски, Даниел Ѓорѓески, Дејан Манасков, Гоце Ојлески, Гоце Георгиевски, Стојанче Стоилов, Жарко Пешевски, Никола Маркоски, Филип Лазаров, Кирил Лазаров, Влатко Митков, Филип Талески, Стефан Дрогришки, Велко Маркоски, Мартин Поповски, Бојан Маџовски, Марко Нелоски, Филип Миркуловски, Мартин Велковски, Ласко Андоновски, Ристо Арнаудовски, Мартин Манасков, Кирил Колев, Јовица Младеновски.
Националниот тим ќе остане во Маврово до 30 декември по што играчите ќе добијат неколку слободни денови за Нова година. Со работа ќе продолжат во Скопје на 2 јануари и низ трите пријателски средби со селекцијата на БиХ ќе се кристализира и составот што ќе патува на СП.
Мундијалскиот турнир почнува на 11 јануари и ќе трае до 29 јануари. Македонија својот прв настап ќе го има на 12 јануари во Мец (17.45 ч.) против Тунис во групата Б во која се и Словенија, Ангола, Исланд и Шпанија. Два дена подоцна (20.45 ч.), „црвено-жолтите“ ќе играат со Ангола, на 16 јануари (17.45 ч.) е мечот со Словенија, на 18 јануари (20.45 ч.) е дуелот со Шпанија и на 19 јануари (17.45 ч.) е пресметката со Исланд.
И младата репрезентација на подготовки во Маврово
Заедно со сениорската репрезентација на Македонија, во Маврово ќе работи и младата која во наредниот период ќе се подготвува за настап на турнирот во Скопје (4-6 јануари) во квалификациите за СП 2017 во Алжир. Селекторот Илија Темелковски за таа цел повика 15 играчи.
Мартин Томовски (РК Металург 2), Никола Даниловски (РК Пелистер 08), Димитар Димитриоски (РК Металург 2), Давор Палевски (РК Металург), Мице Шилегов (РК Металург 2), Томислав Јагуриноски (РК Металург), Филип Арсеновски (РК Металург), Милан Лазаревски (РК Металург 2), Дејан Кукуловски (РК Вардар јуниор), Горан Крстевски (РК Металург), Марио Танкоски (РК Металург 2), Стефан Трпчевски (РК Вардар јуниор), Дарио Петровски (РК Еурофарм Работник), Михаил Аларов (РК Пролет 62), Иван Џонов (РК Пролет 62).
Македонија е во групата со Португалија, Полска и Турција, само првопласираната селекција ќе обезбеди место на СП 2017 во Алжир во втората половина на месец јули.