Рускиот премиер Дмитриј Медведев им порача на трговците од својата земја дека увозот на земјоделски производи не е секогаш прифатлив ни во однос на цената, ни во однос на квалитетот и дека некои испораки се опасни по здравјето заради високите количества на пестициди и нитрати.
Во таа прилика тој ги спомна јаблоката од Полска и Србија, а на почетокот на март се говореше и за тоа дека Русија би можела да го сопре увозот зашто во јаболката е откриено високо ниво на пестициди.
Сега, пак, во српската Стопанска комора тврдат дека јаболката потекнувале од нелегален увоз на јаболка од Македонија, а причина за намалениот извоз на српски јаболка биле високите цени во Србија. Во комората се вели и дека заради тоа увозот на јаболка во Русија од Србија е намален за повеќе од двапати.
Директорот на претставништвото на Стопанската комора на Србија во Москва, Радојица Сретеновиќ, вели дека причина за намалениот извоз на српски јаболка во Русија е токму високата цена на локалниот српски пазар.
– Тоа предизвика зголемување на реекспортот на јаболка, на нелегален реекспорт од Македонија и тоа е една од основните причини за појава на пестициди во јаболката во Русија, која е воочена во некои пратки од вкупно 60 тони – вели Сретеновиќ за „Танјуг“.
Во српското Министерство за надворешна и внатрешна трговија велат дека руското Министерство за земјоделство никогаш официјално не тврдело дека српските јаболка имаат високо ниво на пестициди и дека е зголемена соработката на фитосанитарните експерти од двете земји,
Министерството за земјоделство на Србија, пак ,тврди дека овогодишните анализи на примероци од јаболка кај производителите и во магацините покажуваат дека нивото на пестициди е во склад со правилниците. Од 20-те најголеми извозници во Русија, Србија зазема 17 место.