Еден од македонските спортски амбасадори, Јошко Миленкоски, со нов ангажман покрај клупскиот во Малиje Мили Пјанго од Анкара. Тој во иднина го презема водењето и на машката одбојкарска репрезентација на Турција. Договорот е постигнат, промоцијата е најавена за наредната недела.
„Ми претставува чест што добив доверба да ја водам турската репрезентација. Можност за овој ангажман имаше и порано, но не дојде до реализација бидејќи понудата се однесуваше на фокусирање само на националниот тим. Такво нешто не можев да прифатам затоа што не сакав да се разделам со Малиje Мили Пјанго. Во федерацијата, во меѓувреме, се сменија некои работи, мојот услов е прифатен и нема пречка за отпочнување на соработка и на тоа поле“, изјави синонимот за успех во македонската одбојка кој веќе шест години е присутен на одбојкарската клупска сцена во Турција.
Малије Мили Пјанго е петопласирана на табелата во турскиот шампионат. Тимот на Миленкоски е во серија од три победи и во досегашните 11 кола во сезоната освои 21 бод, шест помалку од лидерот Зират Банка.
„Пред репрезентацијата на Турција е период на напорна работа за настапите на три фронта во 2017 година. Во мај се играат квалификации за Светско првенство, нè очекува учество во Светска лига, а кулминација ќе биде Европското првенство во Полска“, додаде Миленкоски.