Новак Ѓоковиќ ја почна годината со победа на АТП турнирот во Доха. Србинот во првото коло го совлада германскиот тенисер Јан Ленард Штруф со 7:6, 6:3. На теренот покажа завидно ниво на самодоверба, на прес-конференцијата по мечот демонстрира одлично расположение, но и хумор на своја сметка.
„Ова беше мојот најдобар меч во 2017 година. Напишете го тоа“, низ насмевка се обрати Ѓоковиќ на новинарите.
Вториот светски рекет имаше негатива од 2:5 во првиот сет меѓутоа успеа да ја анулира и преку тај-брејк да поведе со 1:0. Во наредниот ја презеде контролата и не дозволи да биде загрозена победата.
„Никогаш не знаете како ќе почнете. Сепак е прв настап во сезоната и треба психолошки да се навикнете дека мечевите не се тренинзи туку дека играте пред публика и за поени. Штруф беше агресивен и одличен во ударите од основната линија. Но, тоа не ме загрижи. Бев позитивен и верував во пресврт што и се случи“, коментира српскиот ас.
Следен негов ривал во Катар каде ја брани титулата ќе биде Аргентинецот Хорасио Зебалос.
АТП Доха (серија 250)
Резултати, 1. коло
Ѓоковиќ (2., Србија) – Штруф (Германија) 7:6, 6:3
Вердаско (Шпанија) – Поспишил (Канада) 7:5, 6:0
Степанек (Чешка) – Багдатис (8., Кипар) 6:4, 5:3 (Багдатис предаде)
Гофан (4., Белгија) – Хасе (Холандија) 7:6, 6:2
Зебалос (Аргентина) – Маер (Германија) 6:7, 6:4, 7:6
Алмагро (Шпанија) – Лоренци (Италија) 7:6, 4:6, 6:3
Весели (Чешка) – Јуксел (Турција) 6:2, 6:3
Браун (Германија) – Багнис (Аргентина) 6:1, 6:7, 6:4
Де Греф (Белгија) – Сафат (Египет) 6:7, 7:5, 6:4