Над стотина турски офицери кои работеле во НАТО а биле отпуштени во “чистката” на турските власти по неуспешниот пуч од 15 јули 2016 година побарале азил во Белгија заедно со нивните семејства, јави белгискиот дневник La Libre Belgique.
Овие офицери се обвинети дека се терористи и не се осмелуваат да се вратат во Турција. Деветнаесет офицери се вратиле во земјата и биле уапсени, изјавил еден полковник за весникот.
Цел на овие офицери е да ја вратат својата чест која турските власти сакаат да им ја одземат.
Според изјавата на полковникот овие лица биле мачени во затвор а 450 работни места од вкупно 600 во повеќе бази на НАТО во Белгија, Германија, Италија и САД биле затворени.
Според декретот на турските власти објавен во ноќта помеѓу петокот и саботата во Службениот весник, отпуштени се 6.000 лица и затворени повеќе десетици организации во рамките на истрагата за пучот.
Властите најавуваат дека турските граѓани кои се наоѓаат во странство и одлучат да не се вратат во земјата во рок од три месеци ќе го загубат турското државјанство.