Европскиот Парламент, во предлог резолуцијата, која ја поднесе известувачот за Македонија, Ричард Ховит. е загрижен за невработеноста кај младите во Македонија за која се вели дека е меѓу најголемите во светот. Од земјава се бара и партиите да седнат и да расправаат за фискалната состојба и кредитните обврски на земјава, што како прашање останува нерасчистено од настаните со буџетот на 24 декември лани.
Во делот за економските прашања, ЕП ја пофали земјава за одржувањето на макроекономската стабилност, но потоа веднаш забележува дека долгот на јавниот сектор е зголемен, квалитетот на фискалното владеење опаѓа, а се забележуваат и негативни ефекти врз странските директни инвестиции како резултат на глобалните економски движења.
Поздравени се легислативните мерки за засилување на деловната клима, како и акциите за развој на здрави среднорочни макро-фискални стратегии, но, истовремено се охрабруваат политичките партии да влезат во транспарентен политички дијалог во однос на фискалната ситуација и кредитните обврски на земјата.
Парламентот со загриженост забележува дека невработеноста продолжува да биде многу висока, при што „невработеноста кај младите е една од највисоките во светот, а вработеноста на жените е на многу ниско ниво“. Владата е повикана да ја подобри координацијата меѓу органите што ги спроведуваат законите од областа на работните односи и да организираат обуки со цел да се засилат капацитетите на социјалните партнери за ангажирање ефикасен социјален дијалог.
ЕП ја истакнува и важноста од создавање на механизам за советување меѓу владата и приватните фирми преку кој ќе се донесуваат одлуки за борба против економската криза и додава дека таков механизам би можел да биде решение кон прилагодување на образовниот систем кон потребите на пазарот, што може да ја намали невработеноста кај младите.
Од Владата се бара и да има подинамичен приод кон регионалните развојни проекти, кои стојат на располагање преку ИПА фондовите и кои ќе ја зголемат прекуграничната соработка и поврзувањето меѓу земјите во регионот.
Се вели и дека „се потребни значителни напори“ во областа на екологијата и тоа особено во областите на квалитетот на водата, заштита на природата и индустриското загадување и се истакнува дека не може да има позначителен прогрес без засилување на административните капацитети. Од Владата се бара и да го подигне нивото на јавната дебата за влијанието на климатските промени и да ја насочи регулативата од ова поле во правец на европската.