Кире Лазаров е број еден по два натпреварувачки дена на Светското првенство во ракомет во Франција. Капитенот на репрезентацијата на Македонија е единствен играч со двоцифрен број погодоци во шесте меча на шампионатот со кои се комплетираше првото коло во групите А и Б.
Ѕвездата на Барселона против Тунис стрелаше со 75 отсто успешност. Упати 16 удари, 12 од нив завршија на вистинско место. Едно од четирите промашувања беше од позицијата десен бек, негова матична, и три дојдоа при обид за пробивање на противничката зона преку средината. Стоотстотен беше при пробиви од шест метри (2/2) и при изведување на пеналлите (4/4).
Покрај головите Лазаров подели и седум асистенции и загуби три топки во 39,01 минути во „Мец арена“. Сите овие бројки му го донесоа и МВП признанието по средбата.
Втор на листата на стрелци е Тунижанецот Усама Буганми со девет гола, на делба на третото место се Словенците Борут Мацковшек и Гашпер Маргуч кои постигнаа по осум погодоци против Ангола.
Рекордна посета на Франција – Бразил
Светското првенство во ракомет за мажи донесе рекорд уште во првиот натпревар. Французите цели 16 години чекаа да организираат голем спортски настан. Нивната нестрпливост притоа ја отсликува посетата на првата средба со Бразил што во арената во Париз, според организаторот, беа присутни 15.609 гледачи што е рекордна посета на еден ракометен натпревар во земјата.
Европјаните со максимален ефект против остатокот на светот
Половина од првото коло укажува на разликата во квалитет што е евидентна на страна на европските репрезентации во однос на останатите на турнирот. Франција го совлада Бразил, Словенија беше подобра од Ангола, Македонија од Тунис, а Русија од Јапонија во четири од шест меча во кои неевропските претставници покажаа малку. Јапонците на физички план ги помачија Русите во 45 минути од меѓусебниот дуел, но и покрај тоа на крајот мораа да се помират со убедлив пораз. „Триколорите“, „дежела, „црвено-жолтите“ и „зборнаја“ притоа постигнаа вкупно 146 гола или во просек по 36,5.
СП во ракомет
Група А
Полска – Норвешка 20:22
Русија – Јапонија 39:29
Франција – Бразил 31:16
Група Б
Шпанија – Исланд 27:21
Македонија – Тунис 34:30
Словенија – Ангола 42:25
Денеска на шампионатот
Група Ц
Белорусија – Чиле (14 ч.)
Германија – Унгарија (17,45 ч.)
Хрватска – Саудиска Арабија (20,45 ч.)
Група Д
Катар – Египет (14 ч.)
Шведска – Бахреин (17,45 ч.)
Данска – Аргентина (20,45 ч.)
Група А
Франција – Јапонија (17,45 ч.)