Специјалното јавно обвинителство отвори истрага за набавката на службениот Мерцедес на екс премиерот Никола Груевски вреден 572.000 евра под кодно име „Тенк“.
Осомничени за „злоупотреба на службената положба и овластување“ се две лица за дејствија случени во периодот од февруари 2012 година до крајот на октомври 2012 година.
„Во конкретниот случај постои основано сомнение дека со цел да ја исполнат желбата на тогашниот премиер за набавка на специјален тип на патничко моторно возило, првоосомничената го поттикнала второосомничениот да ја искористи својата службена положба и овластувања и при вршење на јавни набавки, незаконски да повласти – фаворизира определен економскиот оператор и да се набави возило од тој тип“, пишува во денешното соопштение од СЈО.
Истрагата СЈО ја отворило врз основа на разговори кои се дел од прислушуваните материјали. Јавноста имаше прилика да ги слушне овие разговори поврзани со набавката на „Мерцедесот“ меѓу екс министерката Гордана Јанкулоска и поранешниот премиер Никола Груевски.
Разговор помеѓу Гордана Јанкулоска и Никола Груевски
НГ: Ова со процедурава за набавка за она што ми испрати ти едни…
ГЈ: Да, да, да веќе ја стаивме у постапка со тоа што ја мислам и кажав како треба да испадне, треба само да видам неделава требаше некаде да објавиме за да направиме внимателно, пошто е нели 100 посто електронски да не ни улета некој друг нели треба да има нешто…мислам тој човекот што ми е таму мислам е..отворено му кажав да испадне вака и вака сеа оти не може да не му кажеш, а да испадне…
НГ: Да де да…
ГЈ: Така да он рече добро да проучам што е специфично у однос на другиве за да стесниме простори оти…
НГ: Да да…
ГЈ: … нели на 100 посто електронски, не можеш да речеш, слушај ти не чиниш, посебно што и тие другите чинат нели…
НГ: Ама истовремено треба да се пази тој и да не се заборави кога ќе виде како е работата, тој што ќе понуди…
ГЈ: Е па ние нели ја знаеме вака од прошлиот пат рамката па сега ако забега ако треба па ќе поништиме еднаш па ќе распишеме пак…
НГ: Да, да…
ГЈ: Мислам не може да не дере нели…
Скапиот мерцедес бил набавен во 2012 година. Според разговорите кои ги објави опозицијата Груевски и Јанкулоска заговараат како да излажат во јавноста дека мерцедесот е за МВР, а не за Груевски лично бидејќи тој не сака пред јавноста да се расфрла со скапи автомобили.
Во 2012 година кога медиумите објавија дека МВР купило мерцедес од речиси 600.000 евра македонските медиуми нашироко пишуваа детали за возилото. Во јуни 2012 „Утрински весник“ пишуваше за набавката каде што посочи дека ова е трето блиндинрано возило за полицијата. Од министерството велеа дека возилото ќе се возело единствено по потреба.
