Шпанската Влада реагираше откако на веб сајтот на Белата куќа е избришана опцијата за шпански јазик. Министерот за надворешни работи Алфонсо Дастис изјави дека тоа не е добра идеја во земја каде живеат милиони Шпанци.
-Жалиме што шпанската верзија на сајтот е избришана. Не е добра идеја да се откажете од таков вид на комуникација, особено кога станува збор за земја со 52 милиони луѓе кои говорат шпански јазик, изјави Дастис за новинарите.
Портпаролот на шпанската Влада Индиго Мендез де Виго истакна дека знаењето и употребата на различни јазици во општеството придонесуваат за напредок на земјата и го покажуваат културното наследство на нацијата.
Белата куќа засега не соопшти дали шпанскиот јазик привремено е отстранет поради ажурирање или новата администрација на Доналд Трамп одлучила да го отстрани засекогаш.
Според податоците на американското Биро за попис на населението, Шпанците се со 57 милиони жители најголемо малцинство во САД. Повеќето се од Јужна Америка, а се верува дека околу 13 милиони од нив гласале на претходните претседателски избори, главно за ривалот на Трамп, Хилари Клинтон.
Светските медиуми за време на кампањата известуваа дека Трамп ги навредува Шпанците, меѓу останатото и со предлозите да бидат депортирани милиони мигранти од земјата и со предлогот за изградба на ѕид на американската граница кон Мексико.
Во септември 2015 додека беше во трката за претседателски кандидат на Републиканската партија, Трамп на својот ривал Џеб Буш кој говори шпански, му порача дека треба да зборува англиски додека е во САД.
АФП објави дека првпат од 1989 година наваму, во претседателскиот Кабинет нема да има ниту еден со шпанско потекло.