Почетокот на новата сезона, според многумина, беше означена како проштална за дел од славните имиња на тенискиот спорт што сè уште се присутни на АТП и на ВТА турот. Но, ако се суди по завршницата на Австралија опен, изгледа ќе треба да почекаме до нечија одлука за пензионирање. Наместо сигнали за повлекување, сведоци сме на енергија, жар и страст кај, условно, ветераните во однос на помладите генерации.
Немаше гренслем во последните пет децении со повеќе од тројца полуфиналисти со преку 30 прославени родендени. Во Мелбурн ги има шест од вкупно осумте во машка и во женска конкуренција – Швајцарците Роже Федерер (35) и Стан Вавринка (31), Шпанецот Рафаел Надал (30), Американките Серена Вилијамс (35), Венус Вилијамс (36) и Хрватката Мирјана Лучиќ-Барони (34). Останатите двајца имаат по 25 години – Бугаринот Григор Димитров и Коко Вандевеге од САД.
Просечна возраст на сите нив е 32 години или одделно гледано 31 во машка конкуренција и 33 во женска што е прв случај во професионалната Опен ера. Со нивните пласмани до самата завршница јасно дадоа до знаење дека сè уште има што да понудат на сцената меѓутоа и дека рангирање на АТП листата и младоста значат помалку од врвните квалитети што ги поседуваат сестрите Вилијамс, Надал, Федерер.
Сите имаат и нешто заедничко. Во Мелбурн пристигнаа по подолги паузи поради повреди пришто, освен што успешно се рехабилитирале, очигледно и акумулирале доволно свежина за нов јуриш кон уривање на сопствените и на апсолутни рекорди во т.н. „бел спорт“.
Денеска ќе бидат познати финалистките кај девојките. Венус Вилијамс ќе игра со сонародничката Коко Вандевеге (четврток, 04 часот), по нив на „Род Лејвер арена“ ќе излезат Серена Вилијамс и Мирјана Лучиќ-Барони (четврток, 05,30 часот). До пладне ќе биде познат и првиот финалист кај мажите по швајцарската пресметка меѓу Федерер и Вавринка што е закажана за 09,30 часот.
