Часовникот на апокалипсата беше поместен напред за 30 секунди, на 2 минути и 30 секунди пред полноќ, објавија вчера еминентни научници и пренесува агенцијата АФП. Причината е воената реторика и акциите на Доналд Трамп. Или, накусо, самото доаѓање на власт на Трамп.
Станува збор за познатиот часовник на апокалипсата на Билтенот на научниците за атомска енергија. Часовникот никогаш не бил толку блиску до клучна експлозивна точка, фиксирана на полноќ или “крајот на светот”.
Тој бил креиран во 1947 година. Досега бил поместуван 19 пати. Во 1953 година бил ставен полноќ без две минути во моментот кога СССР ја експлодираше својата прва атомска бомба со што беше означена трката со нукеарно оружје. Часовникот најдалеку од полноќ бил во 1991 година, на крајот на Студената војна.
Лоренс Краус и Томас Пикеринг, двајца еминентни научници
Денес научниците велат дека се загрижени поради “силниот пораст на национализмот во светот, изјавите на Доналд Трамп за нуклеарно оружје, глобалното затоплување и влошувањето на светската безбедност во контекст на се пософистицирани технологии”.
Според нив, изјавите и акциите на Трамп за време на транзицијата се во тотален расцеп со политиките на неговите претходници. Во декември Трамп изјавил дека има намера да го зголеми американскиот нуклеарен потенцијал.
Милијардерот исто така покажал “загрижувачка тенденција за игнорирање и отфрлање на советите на експертите за меѓународна безбедност вклучително и заклучоците на американските разузнавачи” за руското мешање во американската изборна кампања. Научниците се прашуваат дала ова значи дека во опасност е ставена демократијата, изјави Лоренс Краус, физичар од Универзитетот во Аризона.
Часовникот покажува исто така загриженост поради именувањата во Министерството за енергија и Агенцијата за заштита на животната средина кои ги доведуваат во прашање основите на науката за климатологија во моментот кога глобалното затоплување претставува голема закана за идните генерации.
САД и Русија поседуваат 90 отсто од нуклеарното оружје во светот. Двете земји продолжуваат со модернизација и зајакнување на нивниот нуклеарен потенцијал без какви и да е преговори.
Освен САД и Русија, проблем е и Северна Кореја која изведе два нови подземни нуклеарни тестови и најавува дека ќе продолжи со нив за да добие ракети способни да носат нуклеарни глави.
“Путин и Трамп велат дека имаат почит една за друг и можат да се договорат да се однесуваат како државници или како агресивни деца кои се закануваат да го доведат светот во опасност”, вели Краус. Тој ги повика сите во светот “јасно и гласно да им испратат порака на сите лидери за да се сочува иднината на нашите деца”.