Шеснаесетфиналето во англискиот ФА куп беше краен домет за Ливерпул во оваа сезона. Изненадување приреди Вулверхемптон кој на „Енфилд“ триумфира со 2:1. Менаџерот Јирген Клоп призна дека „црвените“ одиграа многу лош натпревар, но лично ја презеде одговорноста за поразот.
„Бевме многу лоши. Лошо почнавме и не се поправивме. Тоа го видоа сите. Не можам да кажам многу добри нешта за натпреварот. Тешко е да се објасни. Јас сум одговорен за составот и не треба да се обвинува ниеден фудбалер. Одговорноста е моја“, изјави Германецот за британските медиуми.
Членот на Чемпионшип лигата поведе уште во прата минута со голот на Ричард Стирман, на 2:0 зголеми Андреас Вајман во 41 минута. Двата гола за „волците“ дојдоа по асистенции на Хелдер Кошта, единствениот за Ливерпул беше дело на Ориги во 86 минута.
Ливерпул го почна мечот во нестандарден состав што резултира со трет пораз во последните осум дена.
„Со голот на почетокот добија на самодоверба на што ние не бевме подготвени. Имавме посед на топката, ја губевме, па прекршок, слободен удар. Паѓаа голови на што ние се обидувавме да возвратиме, но не доволно добро“, истакна тренерот на Ливерпул.
Ливерпул во средата беше елиминиран и во Лига купот на Англија.
„Да не заборавиме дека и тие одиграа добро. Требаше да бидеме подобри. Резултатот е реален. Лут сум, но тоа не е доволно. Мора да се смириме, да се рехабилитираме и да возвратиме“, порача Клоп.
ФА куп
Шеснаесетфинале
Ливерпул – Вулверхемптон 1:2
Блекбурн – Блекпул 2:0
Барнли – Бристол сити 2:0
Челзи – Брентфорд 4:0
Кристал палас – Манчестер сити 0:3
Линколн – Брајтон 3:1
Мидлсборо – Акрингтон 1:0
Оксфорд – Њукасл 3:0
Рочдејл – Хадерсфилд 0:4
Тотенхем – Вајкомб 4:3