Премиерот на Романија, Сорин Гриндеану, во обид да ги спречи масовните протести, најави дека на утрешната владина седница ќе ја повлече контроверзната уредба со која ќе се декриминализираат многу случаи на корупција на функционери.
Тој додаде дека после тоа ќе се отвори дијалог во јавноста за да се најде решение за спорната одредба.
Веста одекна на улиците на Букурешт, па насобраните демонстранти веќе почнаа да слават.
Претходно, ваква одлука најави и коалицискиот партнер на владејачките социјалдемократи.
Во исто време илјадници демонстранти го окупираа Букурешт и протестираа против таа мерка, која ја донесе владата под водство на ПСД, што е на власт од 4 јануари.
Се очекува протестите низ целата земја да продолжат и следната недела.
Со оглед дека и поддржувачите на власта планираат контра протест, власта сака да избегне можна експлозија на ситуацијата.
Според уредбата, корумпираните функционери би завршиле во затвор само ако злоупотребените пари надминат сума од 200.000 леи (47.500 долари). Уредбата која ја прифати владата, веднаш стапи на сила.
Оваа мерка дури им дозволува на корумпираните министри и директори целосно да ја избегнат казната во некои случаи, на пример кога криминалот се случил меѓу членови на исто семејство.
Критичарите велат дека уредбата ги поткопа кревките напори за да се спрели корупцијата. Претседателот на владејачката Социјалдемократска партија, Ливиу Драгнеа, е меѓу оние кои би можеле да имаат корист од неа. Нему му беше забрането да ја преземе должноста премиер по изборите во декември, поради можноста да биде осуден во судски спор за корупција.
Уставниот суд во меѓувреме прими три петиции со барање да се преиспита легалноста на уредбата која предизвика критики од Европската Унија и САД.