“Главната определба е дека нема промени на Уставот”, изјави синоќа на Телма генералниот секретар на СДСМ Оливер Спасовски зборувајќи за договорот помеѓу неговата партија и ДУИ.
Според Спасовски, во однос на албанскиот јазик и двојазичноста, договор е постигнат за стратегиските правци, а дека деталите треба да се решат по добивањето на мандатот за нова влада:
„Главната определба е дека нема промени на Уставот. Не се разговараше само за јазикот, туку и за европскиот пат на Македонија и за суштински прашања во однос на реформите во земјата. Во Македонија со законот од 2008 година во употреба се повеќе јазици, и албанскиот, и српскиот, и турскиот… Некои општини се и повеќејазични. Материјалите во Собранието и денес се делат на албански јазик. Во судот и денес се употребува албанскиот јазик. Двојазичност на амблемите? Тоа се претпоставки, вештачки се наметнува тензија, тоа е дел од пропагандата. Разговаравме за генералните правци, а аспектите ќе ги отвораме откако ќе го добиеме мандатот. Во јавноста ВМРО-ДПМНЕ се обидува да го скрие катастрофалното владеење со патриотските приказни за заштита од двојазичноста. Ние и денеска имаме двојазични лични карти“, рече Спасовски и додаде дека наскоро ќе ги објават наредните чекори.
Спасовски вели дека одлуката на Иванов да не му го даде мандатот на Заев е заштита на Груевски и на ВМРО-ДПМНЕ наспроти интересот на граѓаните на Македонија. Според него, Иванов му го дал мандатот на Груевски и покрај тоа што и во тој момент постеше платформата на Албанците по која се водеа преговорите помеѓу ВМРО-ДПМНЕ и ДУИ.
“По првото прекршување на Уставот, кога му го додели мандатот на Груевски, ова денешно одбивање е второ прекршување на Уставот од страна на претседателот”, рече Спасовски во интервју на ТВ Телма.