Специјалното јавно обвинителство информира дека е обжалено решението на судијата на претходна постапка при Основниот Суд Скопје 1 за неизрекување на мерка притвор за првоосомниченото лице во предметот „Труст“.
Кривичниот суд го одби барањето на СЈО за притвор за бизнисменот и сопственик на телевизијата „Нова“ (која не е поврзана со порталот НОВАТВ) Сеад Кочан, кој е осомничен во случајот на СЈО под кодно име „Труст“.
„Постапувајќи по предлози на Јавното обвинителство за гонење кривични дела поврзани и кои произлегуваат од незаконското следење на комуникациите (СЈО), пред судии на претходна постапка при Основниот суд Скопје 1 – Скопје вчера беа повикани двете лица, за кои се однесуваат предлозите за определување мерка притвор, да се произнесат во однос на предлозите во присуство на Јавен обвинител од СЈО и овластен правен застапник. Во однос на лицето С.К. по разгледување и ценење на фактите и доказите приложени во предлогот за определување мерка притвор, судијата на претходна постапка донесе решение со кое го одби предлогот на СЈО“, соопшти судот.
За Василие Авировиќ, Специјалното јавно обвинителство го преиначило барањето и наместо притвор побарало забрана за учество на тендер и забрана за контактирање со одредени лица. Ова барање на СЈО е уважено од судијата на претходна постапка во Кривичниот суд.
Кочан и Авировиќ се осомничени за фалсификувале документи со кои добиле тендер од 17 милиони и 200 илјади евра од ЕЛЕМ за ископ на јаглен и јаловина од рудникот Суводол. Овие три фирми на тендерот настапиле како конзорциум, а главен носител била „Трансмет“.
СЈО воедно ги демантира сите шпекулации во определени медиуми со кои се тврди дека обвинителката Фатиме Фетаи нема да биде дел од тимот на ова Јавно обвинителство.