Продажбата на Милан е одложена за крајот на овој месец и покрај најавите дека денеска ќе биде завршена трансакцијата. Мнозински сопственик на клубот од „Сан Сиро“ е Силвио Берлускони на чие место треба да влезат инвеститори од Кина.
Финалната трансакција првично требаше да се реализира во декември. Меѓутоа „Фининвест“, холдинг на Берлускони, и кинескиот „Сино Јуроп Спорт“ тогаш се договорија за тримесечно одлагање на зделката.
Потпретседателот на „росонерите“ Адријано Галијани на денешниот состанок со акционерите истакна дека „условите од договорот не се исполнети и затоа неговото затворање не можеше да се оствари денеска“. Џузепе Скала, претставник на помалите акционери, упати обвинување кон „Фининвест“ за нетранспарентност во постапката и побара од клубот поотворено да споделува информации со акционерите за нејзиниот тек.
Од „Фининвест“, пак, порачаа дека ја разгледуваат можноста за составување на договор што би овоможил продажба на клубот, а новиот датум за завршување на трансакцијата би требало да биде 31 март.
Вредноста на Милан е фиксирана на 740 милиони евра, а кинеските инвеститори веќе уплатија 200 милиони евра како депозит. Берлускони, кој 30 години и газда на Милан, притоа побара од нив да вложуваат по 350 милиони евра во наредните три години за засилување на екипата.
Милан има 18 шампионски титули во Серија А и седум пати беше првак на Европа.