„Црно-белите“ попладнево ги декласираа „металците“ во СЦ „Јане Сандански“ со 93:62 за втора победа во сезоната на белграѓани и втор пораз на скопјани
МЗТ Скопје доживеа тежок пораз на домашен терен во вториот АБА меч во оваа сезона. Партизан го совлада македонскиот првак со 93:62 во 40 минути баскет во СЦ „Јане Сандански во кои победникот ниту еднаш не беше доведен во прашање.
„Црно-белите“ ги добија сите четири периоди во средбата. Најубедливи беа во првиот (29:16) што во вториот додадоа уште 10 (19:9) и на одмор да заминат со 48:25. Резултатски најтесна беше третата четвртина што, сепак, заврши на страна на гостите од Белград со 22:21, рутински беше одработен и последниот со 23:16. Лошото издание на „штрковите“ попладнево беше причина за незадоволството меѓу навивачите кои на моменти побараа оставка на тренерот Емил Рајковиќ.
Најефикасен на средбата беше гостинскиот Американец Хечер со 21 поен, еден повеќе од домашниот Тејмс. Кај „металците“ двоцифрен беше уште Џеремаја Мејси со 15, меѓу партизановци се истакнаа и Бирчевиќ со 19 и Маринковиќ со 16 коша. За МЗТ Скопје ова е втор пораз во регионалното натпреварување (во преммиерниот меч загуби од Црвена звезда во Белград), за Партизан, пак, е втора победа по воведната во Бар против Морнар (58:57).
Рајковиќ: Подготвени за промени, ако треба и јас ќе заминам
Емил Рајковиќ е свесен за лошата партија што ја прикажаа неговите, пак, играчи. Факт е дека се повреди Лалиќ, но ако тимот од населба Аеродром е доведен во позиција дотолку да зависи од поединец, тогаш сезоната нема да биде на добро по „металците“. Лошиот вовед, неконценрацијата во одбрана и катастрофалниот шут за три (погодени само четири тројки од 30 обиди) на прв поглед се чинат клучни фактори за убедливиот пораз.
„Што сме згрешиле, како натаму и дали може да продолжиме се прашања што најчесто се вртат по ваков пораз. Ако почнам да зборам за проблеми ќе бидам сфатен како да барам алиби што не сакам ниту ми е цел. Отсуството на Лалиќ ќе биде уште еден товар и ќе се одрази на ротацијата“, почна Рајковиќ и продолжи:
„Партизан беше побрз и посилен од нас. Почетокот на сезоната не е онаков каков што сакавме, а пред нас е дуел со Цедевита. Од ова што досега го видов може да кажам дека одредени кошаркари не ја оправдаа довербата. Подготвени сме и на промени, ако треба подготвен сум и јас да заминам“.
Џикиќ: Успеавме да победиме, но имавме и среќа
Поранешниот селектор на Македонија, моментно тренер на Партизан, Александар Џикиќ изрази задоволство од настапот на неговите кошаркари во Скопје.
„Успеавме, како-така, да го исконтролираме мечот. Успеавме да ја смириме брзоплетоста и паниката во нападот. Имаме проблеми со повреди, но успеавме да победиме. Имавме и среќа. Се повреди Лалиќ кој отвора многу шутеви од дистанца на Симоновски и Темс“, истакна Џикиќ.
МЗТ Скопје – Партизан 62:93 (16:29, 9:19, 21:22, 16:23)
СЦ „Јане Сандански“ во Скопје. Гледачи: 5.000. Судии: Херцег, Хордов, Драгоевиќ.
МЗТ Скопје: Цветковски, Темс 20, Томас, Мекиќ, Мејси 15, Клоф 4, Симоновски 5, Лучиќ 9, Младеновски 1, Скот 4, Лалиќ. Тренер: Емил Рајковиќ
Партизан: Робинсон, Ратковица 5, Врабац, Маринковиќ 16, Величковиќ 5, Мајсторовиќ 11, Бирчевиќ 19, Копривица, Андриќ 8, Хечер 21, Пот, Луковиќ. Тренер: Александар Џикиќ