Синдикатот на работниците од управата, правосудните органи и здруженија на граѓани (УПОЗ) ќе излезат на улица бидејќи се револтирани од односот на Владата. Тие од колумна на министерот Фатмир Бесими дознале дека наместо поголеми плати, административците ќе добијат методологија за нивната продуктивност.
-Незадоволството е огромно. Во 5 до 12 да се бараат изговори дека сега ќе се прават методолигии, сега ќе се прави оценување…. а тоа го има во секој закон. Мислевме дека се разбираме и покажавме солидарност со кризата што се случува, но тоа не е доволно за Владата. Се спремаме со сите органи за одлука за генерален штрајк, информира Трпе Дејановски од УПОЗ.
Марјан Ристески од Конфедерација на синдикални организации на Македонија (КСОМ), рече дека очекуваат да им се каже што се случуваа со оваа категорија вработени, односно дали има пари за реализација на нивните барања согласно со колективниот договор за којшто се усогласија со Министерството за правда и за линеарно зголемување на платите за 30 проценти.
– Се штрајкува, не се даваат изводи, нервоза кај вработените. Ова е игра на нерви од нивна страна, на издржливост, не знам што. Најверојатно имаат некоја стратегија, нека кажат која а. Доколку и понатаму не се огласат за нашите барања следниот чекор ќе биде масовен протест пред Влада. Сите институции ги поминавме, остана уште премиерот Ковачевски. Се добива впечаток дека воопшто не се заинтересирани, рече Ристески.