Дарио Ивановски и Дрита Ислами се прогласени за најдобри атлетичари во сениорска конкуренција за 2018 година во изборот на Атлетската федерација на Македонија (АФМ).
Членот на атлетскиот клуб Работнички имаше плодна година на резултатски план. Победи на полумаратоните во Скопје и во Белград и стана регионален шампион. Мина прв низ целта во уличните трки „Трчаме кон целта“ и „Скопје ран“ на 10 километри.
Ивановски учествуваше на Светското првенство во сала во Бирмингам, постави рекорд на Балканското првенство во сала во Истанбул, трчаше во финалната трка на Медитеранските игри во Тарагона. Настапи на Европското првенство во Берлин во трката на 1.500 метри, а на Балканијадата во Стара Загора истрча време за нов државен рекорд на 3.000 метри. Од АФМ го посочуваат како најнадежниот атлетичар што Македонија го имала во последните неколку години и важи за сериозен кандидат за летните олимписки игри во Токио во 2020 година.
Изборот на Ислами, пак, од АФМ е образложен со нејзини „успешни настапи на Медитеранските игри во Тарагона, на Европското првенство во Берлин и на Балканското првенство во Стара Загора во трките на 400 метри со пречки“. Годината што изминува, за клупската колешка на Ивановски, е опишана како „континуитет на успешната 2017 година во која продолжила да се доближува до зацртаната цел – Токио 2020“.
Атлетската федерација на Македонија со гордост, и со право, ги истакна 11 државни рекорди што беа урнати во 2018 година од кои осум во сениорска конкуренција и три во помладите категории. Речиси половина од нив се дело на Адријана Поп Арсова од атлетскиот клуб Делта која трипати го поправаше најдоброто национално време во маратонските трки и сопственичка е на рекордите на 10 километри во две категории, но, се чини, недоволно да биде и лауреат на свеченоста.
Избор на АФМ на најдобрите во атлетскиот спорт во 2018 година
Сениор: Дарио Ивановски (АК Работнички)
Сениорка: Дрита Ислами (АК Работнички)
Младинец: Милан Вељковиќ (АК Куманово)
Младинка: Бесијана Мустафа (АК Лирија) и Ајше Халили (АК Студент)
Помлад младинец: Наско Стаменов
Помлада младинка: Јана Митовска (АК Работнички)
Пионер: Адријан Исмаили (АК Студент)
Пионерка: Гала Урдаревска (АК Работнички)
Помлад пионер: Владимир Битољану (АК Работнички)
Помлада пионерка: Сара Османовска (АК 7 мај)
Тренер на годината: Филип Колевски (АК Куманово) и Александар Војнеска Зикова (АК Работнички)