Агенцијата за национална безбедност ќе ги вработува најдобрите македонски студенти

Директорот на Агенцијата за национална безбедност (АНБ), Виктор Димовски и ректорот на Универзитетот во Битола, Сашо Коруновски викендот потпишааа Меморандум за соработка. Со документот се потврдува заедничката заложба за унапредување на соработката во областа на едукацијата на кадри заради ефикасно спроведување на надлежностите утврдени со Закон и се креира формално правна рамка за заемна помош и поддршка во повеќе области од заеднички интерес, изработка на стратешки документи од областа на безбедноста, научно-истражувачка и апликативна дејност, заемна експертска помош, како и профилирање на професионален кадар од редовите на студентите на Универзитетот, за потребите на Агенцијата.

Потпишувањето на Меморандум е дел од активностите на АНБ на реформски план. Во текот на викендот беше потпишан Меморандум за соработка и со Универзитетот “Св. Кирил и Методиј” од Скопје, а следува потпишување на Меморандуми и со Штипскиот и со Тетовскиот универзитет.