Лидерот на ДУИ, Али Ахмети денеска се сретна со Кристијан Хелбах, специјален претставник на германското МНР за Југоисточна Европа, Турција и државите од ЕФТА.
Ахмети и Хелбах разговарале за ситуацијата во која се наоѓа Македонија и како да се излезе од политичката криза и институционалната блокада.
„Ахмети зборувал за улогата на ДУИ за одржување на сеопфатни и кредибилни избори како и инсистирањето да се заокружи Рамковниот договор, системските реформи и Евроатланската интеграција. Ахмети истакна дека изборите беа организирани за да ја решат кризата, а не за да ја продолжат или продлабочат кризата. Хелбах истакна дека Германија има разбирање за одлуката на Ахмети и ја нагласи поддршката на Берлин за интегрирана Македонија во евроатланските структури и Македонија со ефикасни системски реформи“, пишува во соопштението на ДУИ.
Ахмети го информирал Хелбах дека се прават напори за да се деблокира Собранието и да профункционираат институциите.
Лидерот на ДУИ нагласил дека оправдувањата на Иванов да не го додели мандатот се неодржливи затоа што Заедничката Изјава била резиме на изборните програми на Албанските парламентарни партии и на ниту еден единствен начин не го загрозувала уставниот поредок на Македонија.