Published: Saturday, March 17, 2018 16:13
Со усвојувањето на Законот за јазиците се заокружува нормативниот дел од Охридскиот мировен Договор, кој е загарантиран од ЕУ, САД, НАТО и ОБСЕ, рекол претседателот на ДУИ Ахмети на средбата со Британскиот Амбасадор Чарлс Гарет, соопштија од ДУИ. Ахмети очекува политичките лидери, сега, да продолжат со усвојување и спроведување на системските реформи и да се постигне достоинствен компромис со Грција во врска со спорот за името.
Ахмети исто така рекол дека ДУИ заокружила едно поглавје од својата политичка активност и почнува да ја гради „утрешната„ ДУИ. За ова поглавје, ќе се дебатира на партиските состаноци неделава.
Неизвесно е дали и на кој начин Законот за јазици ќе стапи на сила по одлуката на претседателот на државата Иванов да не го потпише Указот за негово прогласување. Претседателот на Собранието Џафери вчера во интервју за „Ноќно студио“ рече дека Иванов со ваквата постапка го прекршува Уставот, но не кажа кои ќе бидат неговите следни чекори.
Според правните експерти што ги консултираше НОВА, и покрај сите прекршувања што беа направени при носењето на Законот, претседателот треба да го потпише Указот, а потоа да го достави до Уставниот суд, како единствена институција која оценува дали некој закон е уставен или не.
