Ако Финска поднесе барање за влез во НАТО, тоа ќе биде „за безбедност“ на нејзините граѓани, изјави денеска финската премиерка Сана Марин.
Говорејќи за време на заедничката прес-конференција со јапонскиот премиер Фумио Кишида во Токио, Марин рече дека разговарала со својот јапонски колега за „плановите на Финска да аплицира за членство во НАТО“. „Ако Финска го направи овој историски чекор, тоа е за безбедноста на нашите граѓани. Приклучувањето кон НАТО ќе ја зајакне целата меѓународна заедница која се залага за нашите заеднички вредности“, рече Марин.
Вчера, парламентарната Комисија за одбрана на Финска и препорача на Комисијата за надворешни работи дека треба да ја поднесе апликацијата за членство во НАТО. Комисијата за одбрана соопшти дека верува дека членството во НАТО ќе биде најдоброто решение за финската безбедност.
Финската министерка за европски прашања Тути Тупураинен изјави за Си-Ен-Ен дека е „многу веројатно“ дека земјата ќе аплицира за членство во НАТО. Таа рече и дека се надева дека доколку Финска аплицира да се приклучи на Алијансата „процесот на ратификација ќе биде што е можно пократок“.