Семејството на Тони Ѓоргиевски Фердо, кој е обвинет за убиство со умисла, бидејќи го застрела поранешниот зет, бара да се укине мерката притвор и осoмничениот да се брани од слобода. Поранешниот зет пред два дена насилно му упадна во домот, заканувајќи и се со нож на неговата ќерка, односно на неговата поранешна сопруга.
Битолчани денеска побараа слобода за Тони Ѓоргиевски.
– Ако татко ми не пукаше, ќе настрадаше дел од семејството со гаранција. Денес ние ќе бевме мртви. Беше подготвен и сопствените деца да ги убие“, кажа Јове Ѓоргиевски, син на осомничениот битолчанец Тони Ѓоргиевски-Фердо (62) на денешниот мирен протест пред Основниот суд во Битола, пренесе СДК.
Починатиот Стојанче Соколов ѝ е познат на полицијата како прекршител на закони, а веќе 20 години ги малтретирал семејството Ѓоргиевски.
Пред да се случи убиството, истакна синот Јове Ѓоргиевски, Соколов ѝ се заканувал на неговата сестра, која, заедно со двете деца, утрото побегнала кај својот татко.
На Ѓоргиевски Фердо денеска му е определена мерка притвор од 30 дена, а неговиот син Јове синоќа преку Фејсбук повика на мирен протест.
-Драги пријатели, добри намерници и сите што ја знаете вистината за татко ми кој го бранеше своето семејство од 20 годишните маки. Ве повикувам на 23.02.2022 година во 12:00 часот на мирен протест пред судот во Битола поради одлуката на судот да ми го приведе тато и истиот да биде пуштен дома да се брани од слобода за дело што самиот го направил. -одбрана да спаси пет животи и неговиот, објави на Фејсбук синот Јове.
Ѓоргиевски пред два дена со пиштол го застрела поранешниот зет за ќерка, Стојанче Соколов (44), откако тој им упадна во куќата и им се закануваше со нож.
Основното јавно обвинителство Битола вчера донесе Наредба за спроведување истражна постапка против едно лице за кое постои основано сомнение дека сторило кривично дело – Убиство од член 123 став 1 од Кривичниот законик.
– Осомничениот, на 21 февруари, со умисла го лишил од живот неговиот зет за ќерка. Според првичните сознанија, сега починатиот, вооружен со долг нож, започнал да удира со клоци по дрвената влезна врата од домот на осомничениот и ја скршил. Штом влегол во домот, во претсобјето бил пречекан од осомничениот кој пукал директно во него со пиштол „Бајкал“ што го поседувал со дозвола. Го застрелал со два последователни истрели, па оштетениот веднаш паднал и починал на лице место, соопштија од ОЈО Битола.
По настанот, јавен обвинител изврши увид и издаде наредби за обдукција на телото на починатиот, за прибирање траги од лице место кои ќе бидат предмет на вештачење, како и за обезбедување на снимки од видеонадзор на објектот.