Акциите на банките ширум светот паднаа и покрај уверувањето на американскиот претседател Џозеф Бајден дека американскиот финансиски систем е безбеден по колапсот на две американски банки, објави Би-Би-Си.
Акциите паднаа откако властите презедоа мерки за заштита на депозитите на клиентите во Силиконската долина банка – SVB и Signature Bank, се вели во извештајот објавен синоќа.
Американскиот претседател Џозеф Бајден вети дека ќе стори „се што е потребно“ за да го заштити банкарскиот систем.
Тој вчера им порача на Американците дека финансискиот систем на земјата е стабилен.
Ненадејниот банкрот на две банки ги зголеми стравувањата од поголема криза. Инвеститорите стравуваат дека другите банки би можеле да бидат погодени од последиците, а акциите на глобално ниво драстично паднаа.
Во петокот, американското регулаторно тело ја затвори SVB, специјализирана за кредитирање на технолошки компании. Тоа е најголемиот колапс на американска банка од финансиската криза во 2008 година.
Во неделата властите ја запленија Signature Bank во Њујорк, која имаше многу клиенти вклучени во криптовалути.