За три денари се зголемува цената на акцизата за нафтените деривати во Република Северна Македонија. Оваа уредба со законска сила за примена на законот за акцизите за време на вонредна состојба e донесена денеска од Владата како мерка за справување со кризата предизвикана од ковид-19.

Владиниот портпарол Муамед Хоџа на денешната прес-конференција нагласи дека зголемувањето на акцизата за три денари нема да предизвика дополнителни финансиски импликации врз компаниите и населението, ниту, како што рече, од тоа ќе трпат транспортната или другите дејности зашто цената на нафтата е намалена за 20 денари. Сите средства од зголемената акциза ќе одат во државниот Буџет, односно во Фондот за справување со коронавирусот.

„Ова е добро и правично решение, директна инјекција за државниот Буџет. Уредбата е донесена за ублажување на економските последици од зголемените трошоци за справување со коронавирусот и обезбедување средства за редовно сервисирање на буџетските потреби. Зголемувањето на износот на акцизата нема да предизвика дополнителни финансиски импликации за правните субјекти и населението со оглед на фактот дека значителниот пад на цената на нафтата на светските берзи предизвикува значително намалување и на малопродажните цени на горивата во нашата држава“, истакна портпаролот на Владата.

Предложениот механизам, појасни тој, овозможува постепено враќање на постојните износи на акцизи во услови на нормализирање на цените на пазарот, што, како што рече, се очекува тогаш кога ќе заврши состојбата предизвикана од коронавирусот.

Хоџа: Зголемувањето на акцизата донесено во консултација со сите засегнати страни

Зголемувањето на акцизата на нафтата за три денари е антикризна мерка, донесена по предлог на Министерството за финансии, во претходни консултации со експерти и со сите засегнати страни, рече Хоџа.

„Пред носење на ваквата одлука, се разбира, земени се предвид сите совети и анализи направени од експерти, од вработени во Министерството за финансии и во Владата, како и од сите други засегнати страни“, нагласи Хоџа.

Запрашан зошто Владата не донесе одлука за израмнување на акцизата на екстра лесното гориво со таа на дизелот, како што бараше Стопанската комора, Хоџа беше дециден дека ефектот од таквата мерка би бил речиси никаков.

„Екстра лесното гориво е наменето само за лимитирана употреба и законски е забрането за продажба од 15 април, ефектот од таквата мерка би бил скоро никаков“, истакна портпаролот на Владата.