Претседавачот на ОБСЕ и министер за надворешни работи на Северна Македонија, Бујар Османи, изјави дека неговиот предлог за деескалација и нормализација на ситуацијата на Косово е доставен до мисиите во Белград и Приштина, јави Ал Џезира.
Тој како што посочи телевизијата рекол дека планот од девет точки не е план на ОБСЕ, бидејќи таа меѓународна организација ги носи одлуките со консензус, туку на Северна Македонија и тој како претседавач со ОБСЕ.
НАТО почна да ги зајакнува мировните сили на Косово по минатонеделните немири на северот на земјата, објави Алијансата.
Насилството избувна откако косовските власти назначија градоначалници етнички Албанци на раководни позиции во северните општини, кои беа избрани со излезност од 3,5 отсто, бидејќи мнозинството Срби во регионот ги бојкотираа локалните избори.
Во судирите беа повредени 30 припадници на мировните сили (КФОР) и околу 50 српски демонстранти.
„Мојата улога како претседавач со ОБСЕ е да понудам решение за деескалација. ОБСЕ во суштина е платформа за дијалог, комуникација. Имаме две големи операции, едната во Приштина, а другата во Белград“, го цитира Ал Џезира македонскиот шеф на дипломатијата Османи кој синоќа зборуваше за тоа во интервју за Телма.
Османи додаде дека неговиот предлог е еден од комплементарните обиди со другите меѓународни организации и тела за деескалација и нормализирање на ситуацијата и страните „да се вратат на дијалогот што беше постигнат во Охрид“.
„Значи, ние имаме дополнителна обврска, не само како претседавач со ОБСЕ, туку и како земја каде што е постигнат договорот. Можете да видите дека предложените мерки се слични на мерките што ги нудат другите меѓународни организации. Тоа значи дека меѓународната заедница е едногласна во барањето за враќање на страните во дијалогот и спроведување на обврските од основниот договор и анексот, односно Охридскиот договор“.
Османи на 3 јуни објави предлог за план од девет точки за деескалација и нормализација на ситуацијата на северот на Косово, во кој, меѓу другото, се бара градоначалниците на северот на Косово да поднесат оставки во следните месеци, да се распишат вонредните локални избори годинава, но и да се повлече косовската специјална полиција а истовремено да се намали борбената готовност на српските вооружени сили.
Извор: Ал Џезира