Министерот за култура Роберт Алаѓозовски денеска коментирајќи ги барањата што Синдикатот на културата ги упати до неколку министерства, во врска со положбата на врабоботените во националните установи од културата, рече дека е свесен за проблемот и дека тоа произлегува од Законот за култура донесен во 2014 година.
-Уште тогаш ова решение наиде на револт кај вработените во културата, за што ги поддржува и СКРМ и, многу од вработените одбија да примат решенија како „даватели на услуги“. Формулацијата „даватели на услуги“ е понижувачка, рече тој, дека законот мора да се почитува, но Министерството за култура е подготвено да изнајде решение.
-Бидејќи Законот мора да се спроведува, а решенијата за работни места и евиденцијата на вработените во културата треба да се заврши согласно законските прописи, ние сме подготвени да изнајдеме решение што ќе биде во согласност со законските прописи и ќе го заштити дигнитетот на вработените во културата. Предложивме да се употребува терминот „носител на дејност“ наместо „давател на услуги“, како времено, техничко решение за издавање на решенијата и нивно евидентирање во електронскиот систем на МИОА, изјави Алаѓозовски.
Тој исто така рече дека МИОА е подготвено да понуди стручна помош на националните установи за изработка на систематизациите, онаму каде што не се направени. Во оваа насока, МИОА предложи можно решение – да се направат измени и стручните звања да бидат евидентирани како развојна компонента на едно работно место (на пример, конзерватор – виш конзерватор – советник конзерватор). Со овие насоки, ќе се завршат обврските во установите, а МИОА ќе може да ги евидентира сите вработени во културата кои примаат плати од Буџетот на РМ и се дел од јавниот сектор.
Проблемот за стручните звања има и фискални импликации, за што ќе треба да се обезбедат и средства преку Министерството за финансии. Откога ќе се завршат претходните активности и ќе се добијат точни податоци за вработените од националните установи, Министерството за култура ќе може да се обрати до Министерството за финансии за надминување на проблемот со стручните звања, кои вработените во културата ги стекнуваат согласно Законот за култура, но тие сега не се соодветно вреднувани во платите. МИОА предвидува измени во Законот во 2019 година, со што ова прашање ќе се реши трајно во интерес на културните работници.