Мразот на Гренланд во изминатиот месец исчезнува со невидена брзина, а регистрирани се и пожари. Научниците се изненадени и не очекуваа дека ледената плоча ќе се топи со ова темпо уште 50 години, меѓутоа до последната недела од јули, намалувањето на нејзиното ниво ја достигна проекцијата за климатските модели за 2070 година и тоа по најпесимистичко сценарио, објави „Сајенс алерт“.
Ледената плоча на Гренланд загуби 12,5 милијарди тони мраз на 1 август, што е рекорд за еден ден откако истражувачите почнаа со мерење на топењето на мразот во 1950 година, објави „Вашингтон пост“. Драматичното топење сугерира дека ледениот покривач на Гренланд се приближува до пресврт што може неповратно да доведе до целосно исчезнување.
Ако се случи тоа, катастрофалниот пораст на нивото на морето ќе ги проголта крајбрежните градови низ целиот свет. Сезоната на топење на мразот на Арктикот започнува секоја година во јуни и завршува во август, со врв на топење регистриран во јули. Сепак, брзината на топење на мразот во Гренланд оваа година ги надмина очекувањата.
Од 30 јули до 3 август, топењето е забележано на 90 проценти од површината на Гренланд со 55 милијарди тони вода испуштена во текот на пет дена. Слично натпросечно топење е регистрирано и во Швајцарија каде глечерите изгубиле 800 милиони тони мраз за време на топлотните бранови во јуни и јули. Рекордно топење на мразот во јули е забележано, исто така, и на Алјаска.