Опозициските партии од албанскиот блок БЕСА, УНИТЕТИ, НДП и ПДП денеска во заедничко соопштение го изразија својот став дека нема услови за одржување на предвремени парламентарни избори ан 5 јуни.

– Во време кога човековите права и слободи се сериозно повредени, кога демократијата и гласот на граѓанинот се заробени од владејачките партии и кога уставно-правниот систем е нарушен од главните државни институции, ние сме уверени дека предвремените парламентарни избори на 5 јуни 2016 година, распишани од Претседателот на Собранието, не можат да се одржат, се наведува во соопштението.

Тие сметаат дека за за воспоставување нормална состојба во земјата и за одржување на предвремени парламентарни избори треба Иванов да ја повлече одлуката за помилување на сите лица кои се предмет на истрага од Специјалното јавно обвинителство, со помош на меѓународниот фактор да се изнајде начин за одложување на датумот за избори, сè до исполнување на сите предвидени услови во Пржинскиот Договор, и да се изврши притисок кон четирите политички партии потписнички на Пржинскиот Договор со цел негово што побрзо спроведување.

– Без сомнение сме определени за воспоставување на демократијата и целосно обезбедување на правата и слободите на Албанците во земјата, како и за декриминализација на власта, овозможувајќи владеење на правото и борба против корупцијата и криминалот, што подразбира непречено функционирање на Специјалното јавно обвинителство, департизација на сите државни институции, како и слободни, објективни и професионални медиуми, финансирани на транспарентен начин, со што би се создале услови за одржување на кредибилни избори, прифатливи од сите учесници и од меѓународниот фактор, се наведува во соопштението.

Во нивната цел тие бараат поддршка од сите опозициони политички партии, невладините организации, различните субјекти кои ги имаат овие цели, како и од сите албански граѓани и други.

– Ја изразуваме волјата на нашите субјекти за соработка на албанските опозициони партии и ширење на оваа соработка со сите заинтересирани субјекти, како потреба на моментот и барањето на албанското јавно мислење во Македонија, со цел зближување на нашите ставови и платформи и промена на тешката состојба на албанскиот народ во земјата, велат од БЕСА, УНИТЕТИ, НДП и ПДП.

Соопштението следи по средбата на претставниците на овие четири албански опозициски партии.