Секогаш убавите вести ги бодат очите- Силвана Бонева, поранешна пратеничка на ВМРО-ДПМНЕ, веќе цела година добивала пари на сметка од Агенцијата за вработувања во Струмица, по основ “бенефиции за невработени лица”.
Само напред Бонева, ти можеш и повеќе, ова е премалку, недоволно изживување, ситен придонес од сите нас, кон тебе. Во Кралството кое ние ти го создадовме минатата деценија, во времето на владеењето на Груевски, таа остана една од пионерите на цицањето крв од народот.
Сетете се само која е таа, Бонева. На крајот на декември, 2017, таа беше осомничена за злоупотреба на службената положба и незаконско прибавување на 100.000 евра на име патарини. Според истрагата на Специјалното јавно обвинителство под кодно име „Друмарина“, Бонева од 25 јуни 2011 година до 16 декември 2015 до собраниските служби поднесувала лажни фискални сметки за патарини.
Според доказите, Бонева имала сместување во Скопје, а за тој период доставила сметки за патарини за вкупно 843 патувања со сопствено возило.
НОВА ТВ тогаш објави дека Бонева доставувала фискални сметки од патарина кога патувала во 17 часот попладне, а во исто време, истиот ден била се уште во Собранието и гласала во 19 часот. Сметките најчесто ги добивала од таксисти кои сообраќале на релација Струмица-Скопје и обратно.
СЈО направило увид и во броилата за струја во домовите на поранешната пратеничка во Струмица и во Скопје и според нив, таа поголем дел од времето го минувала во Скопје, што е уште еден доказ дека дел од километражата која ја прикажала била фиктивна.
Во март, 2018, беа замрзнати двата стана на синовите на Бонева од страна на СЈО, но откако беше објавена информацијата дека ги сокрила од Антикорупциската комисија. Подоцна, таа и призна дека не го пријавила станот од 109 квадрати во Центарот на Скопје на име на нејзиниот син Орце Бонев, со пазарна вредност од околу 180 илјади евра- кој не беше единствен- таа немаше пријавено и уште еден стан со пазарна вредност од околу 180 илјади евра, за вториот син.
Ова е навистина мала земја, со мали, ситни паразити, морални лилипутанци, алчни, грабливи луѓе кои стануваат политички великани во одредени невремиња во оваа држава, како она на груевизмот. Колку што ги величи Партијата, толку повеќе тие се смалуваат, издишуваат во бедата која им ја произведува политиката, непостоењето на правна држава, на правдата, тие се производи исклучиво на неправдата.
Оваа земја навистина е најмалата од сите што сме ги чуле и запознале, земја во која се станува голем само со лакомоста, неказнивоста и непостоењето на срам- земја на политичките лилипутанци, и ништо повеќе од тоа.