Шефот на изборниот штаб на Алијанса за Албанците Елми Азири изјави дека резултатите од денешните избори ја поставиле Алијансата за Албанците како втора политичка партија на Албанците во Македонија и во албанскиот политички блок.
– Во сите градови Алијансата постигна одлични резултати и во најголем дел од местата имаат и стопроцентно зголемување на гласовите во однос на парламентарните избори во декември 2016, а на некои места дури и од два до пет пати зголемување на нивните гласачи, рече Азири.
Во Струга Алијансата, односно нивниот лидер Зијадин Села како победник оди во вториот круг каде ќе се натпреварува со кандидатот на СДСМ, а додека во Гостивар нивниот кандидат Арбен Тарвари како победник ќе оди во вториот круг и ќе се сретне со Невзат Бејта од ДУИ.
Во втор круг нивните кандидати ќе се натпреваруваат во Врапчиште со кандидатот на ДУИ, во Дебар исто така со кандидатот на ДУИ, и во Боговиње со кандидатот на ДУИ.
– Во Скопје, Чаир и околните скопски општини имаме значително зголемување на гласовите. Слична е состојбата во Тетово и другите тетовски општини каде што на многу изборни места нашите кандидати беа први во бројот на освоени гласови што ја профилира Алијансата за Албанците како најсериозна прогересивна политичка партија во албанскиот политички политички блок во Македонија, рече Азири.
Во однос на можните постизборни коалицирања за вториот круг каде што не се пласирани нивните кандидати, Азири посочи дека претседателството и во потесен и во поширок состав ќе одржи следните денови состанок, по што откако детално ќе ги разгледа сите резултати и ќе донесе вистинска одлука.
Според Азири за Алијансата за Албанците изборниот процес не е само техничка работа што завршува во 19 часот, туку е суштинска и што има влијание врз иднината на граѓаните и особено Албанците во Македонија.