Позитивните сигнали од Алијанса на Албанците навестуваат можност за проширување на владината коалиција со уште осум пратеници.

„Постои можност за влез во Владата. Конкретна понуда нема, но ние сме во постојана комуникација. Гледате како е во Собранието. Мислам дека сме 60-60. Собранието не може да создаде мнозинство без помош на Алијансата. Ако не станеме дел од Владата, тогаш одиме на избори. Нема друго решение. Сепак, приоритет за нас се уставните измени и затоа сме спремни да станеме дел од Владата за да го помогнеме процесот“, рече денеска лидерот на Алијанса за Албанците Арбен Таравари.

Дали ова значи дека Алијанса за Албанците ќе стане дел од владината коалиција останува отворено прашање. Лидерот на ДУИ Али Ахмети, партија која веројатно ќе отстапи позиции за Алијанса за Албанците, не ја исклучи можноста од проширување на владината коалиција.

„Мислам дека парламентарното мнозинство е стабилно, но има еден поопширен и поперспективен пристап, значи да се прошири тоа мнозинство и да се создаде една алијанса за Европа“, изјави Али Ахмети одговарајќи на новинарски прашања.

Според одделни извори, реално е да се очекува Алијанса за Албанците да стане дел од владината коалиција, а не се исклучува и можноста ваквата коалиција како „Алијанса за Европа“ заеднички да настапи и на парламентарните избори во 2024 година кога во Македонија.

Сепак, како што тврдат изворите, во средината на февруари ќе се знае дали ќе дојде до зајакнато владејачко мнозинство со про-европски концепт кое ќе ги истурка уставните измени или пак ситуацијата ќе остане статус-кво.