Зад фудбалската репрезентација на Македонија се два дена на подготовки за саботниот дуел со Лихтенштајн во Лигата на нации. Атмосферата на тренинзите е одлична, позитивна, другарска. Опуштање е присутно кога околностите го дозволуваат, кога се работи се работи турбо и со максимална посветеност и сериозен пристап со единствена цел – нови три бода во групата и чекор поблиску до првото место што значи плејоф за Европското првенство во 2020 година. „Под команда“ на селекторот Игор Ангеловски се стави и Стефан Ристовски за комплетирање на националниот тим, но не и Иван Тричковски од АЕК Ларнака кој ќе мора да паузира во наредните десетина денови поради истегнување на бутниот мускул.
„Мора да победиме со Лихтенштајн оти ништо не е готово. Нема опуштање. Мора да останеме фокусирани оти нема да биде лесно. Во тимот се вратија Аријан Адеми и Ферхан Хасани, поквалитетни сме и тоа мора да го потврдиме и на терен. Се надевам дека ќе успееме на наше задоволство и за радост на публиката“, коментира Езџан Алиоски.
Фудбалерот на Лидс јунајтед во англискиот Чемпионшип ги почна настапите во Лигата на нации на посакуван начин. Постигна гол во премиерата против Гибралтар, потоа и со Ерменија од пенал на домашен терен, но личниот ефект го става во втор план и го потенциа колективниот.
„Сакам да победиме. Тоа ми е најважно. Дали јас ќе дадам гол или некој друг тоа е неважно. Секако дека би сакал да бидам стрелец, но најсреќен ќе бидат со трите бода“, дополни Алиоски.
Натпреварот со Лихтенштајн е во сабота на националната арена „Филип Втори“ со почеток во 20.45 часот. Фудбалската федерација на Македонија ги пушти во продажба влезниците за третиот настап на селекцијата во Лигата на нации, втор на домашен терен, и истите чинат 150 денари за северната трибина и 100 денари за јужната.