Македонија сега е модерна мултиетничка демократија, во која подеднакви права уживаат сите нејзини граѓани. Со Охридскиот договор поставен е важен темел за општеството и направено е многу на градењето мостови меѓу луѓето
Република Северна Македонија сега е многу различна земја, 20 години по потпишувањето на Охридскиот Рамковен Договор со кој е завршен поширок судир. А, со Преспанскиот договор се надмина проблемот со Грција, и земјата сега може да се фокусира на задоволување на неопходните процеси за ЕУ и на потребите на своите граѓани.Несомнено, Македонија сега е модерна мултиетничка демократија, во која подеднакви права уживаат сите нејзини граѓани. Со Охридскиот договор поставен е важен темел за општеството и направено е многу на градењето мостови меѓу луѓето, изјави американската амбасадорка во земјава, Кејт Мари Брнз.
Таа нагласи дека во многу нешта , што порано земјата ги развиваше помогната со разни проекти преку Усаид , дека сега ги развива тие процеси сама. Останува предизвикот на јакнење на независноста на институциите и порача фокусот да се одржи на владеење на правото и на борбата со корупцијата.
Таа нагласи дека власта треба да развива општество со еднакви можности за сите и дека младите треба да го имаат приоритетот.
Во поглед на извршната уредба донесена од страна на американскиот претседател Бајден, Брнз рече дека е тоа многу важна одлука и дека е важно да биде разбрана дека таа е во насока на јакнење на мирот, стабилноста, просперитетот и на демократските процеси во регионот и спречување на корупцијата и на сите оние кои посегаат по неа. Амбасадорката истакна дека наместо да коментира нон пејпери кои се појавија со предлози за поделба на Босна и Херцеговина, дека подобро е да ги повтори американските позиции за почитување на територијалниот интегритет и суверенитет на сите земји во регионот.
Таа нагласи дека се радува дека по Преспанскиот договор се повеќе странски компании гледале интерес да инвестираат во Македонија и наместо за поделби , на Балканот требало да се размислува за создавање на подобри партнерства, за економско и секакво друго поврзување, што ќе доведе до бенефит за граѓаните во регионот.
Амбасадорката , во контекст на бугарската блокада за ЕУ, рече дека САД остануваат на ставот за поддршка на македонската интеграција во ЕУ и дека очекува и ова прашање да се надмине со јакнење на соработката во регионални рамки.